بویون زهرا دا شاعیر درویش بهروان اوچون عزیزله مه توره نی / اسدالله امیری

آنا يوردوم بويون زهرا قال ايندي

 

سه شنبه گونو 11/4/1387 تاريخينده بويون زهرا شهرينين «اداره ارشاداسلامي» سالونوندا بويون زهرانين چاغداش شاعيري «درويش بهروان(ايناللي)» اوچون بيرعزيزله مه مراسيمي گئچيريلدي.

بو مراسيم آخشام ساعات 5 ده باشلاندي. اونجه قرآن كريمدن نئچه آيه تلاوت اولدو، سونرا ايران اسلام جمهوريسينين مارشي چاليندي. سونرا آقاي محمدي بويون زهرا ادبي انجمنينين اويه سي قاتيلانلارا خوش گلدين دئدي. مراسيمين داواميندا دوكتور حسين محمدخاني (گونئيلي) چيخيش ائتدي. دوكتور گونئيلي قاتيلانلاردان و بويون زهرا ارشاد اداره سينين مسووللاريندان تشكر ائده رك، شاعير بهروان حاققيندا قيساجا بير معلومات وئردي:

درويش بهروان(ايناللي) 1313 گونش ايلينده بويون زهرانين خرم­آباد كندينده فيض الله خان آدلي و ياورخانا معروف اولان بير آتانين ائوينده دونيايا گلدي. 20 ايل كندده ياشاياندان سونرا تهرانا كوچدو و ايندي يه كيمي كرج شهرينده ياشاماقدادير. گونئيلي آرتيردي: من ياخين 100 كيتابي يا يازيب يايميشام يا يايماغيندا اشتراك ائديب ادبياتيميزا تقديم ائتميشم، بونلارين بعضيسي چيخماسايدي دا چوخ اونملي دئييلدي آمما درويش بهروانين كيتابلاري بو منطقه ده و ادبياتيميزدا يئري بوش ايدي و منيم افتخاريم دير كي بهروانين اثرلرينين نشرينده منيم ده نقشيم وار، درويش بهروان رسمي تحصيلاتي يوخدورسادا، خلقي تحصيلاتي، جامعه دن، آتا باباسيندان آلديغي درسلر نه قدر دئسن دريندي.بهروان بويون زهرانين جانلي بير دايرةالمعارفيدر. بونون كيتابلاري گلن آراشديريجيلارا بير منبع اولاجاق. بهروانين شعرينده بعضي ايشله نن كلمه لر ادبياتيميزدا يئري بوشدور. بهروانين شعرينده تاريخي حادثه لر اوجومله دن بويون زهرا زنجان طارم و گيلان زلزله سي واجتماعي مساله لري ده گورمك اولار. بهروانين شعرينده بويون زهرا عطري وار. ائله بيل اوره يين بوردا قويوب گئديب. بهروانين شعرينده اسكي شاعيرلريميزين ايزيده وار او جومله دن خسته قاسيم و تيليم خان. گونئيلي سونرا درويش بهروانين كيتابلارينين آدلاريني آپاردي: سونمز ائللرين اوجاغي- آنا يوردوم بويون زهرا- هر شاعير شهريار اولماز- ياشا كنديم- پناه علي و آسيه حكايه سي. گونئيلي سوزلرينين سونوندا بهروانين 80 و 100 ايلليك توره نينين توتماغيني آرزو ائتدي.

سونرا اوستاد بهروان وطنيم آدلي بير شعريني اوخودو.

سونرا كرج عاشيقلار گروهو درويش بهروانين آنا يوردوم بويون زهرا آدلي بير شعريني كر صورتينده اجرا ائتدي.

مراسيمين ادامه سينده شاعيرلر و عاشيقلار شعرلري و سازلاري ايله چيخيش ائتديلر. چيخيش ائدن عاشيقلار : عاشيق آياز شجاعي، عاشيق بهروز شجاعي، عاشيق فيض الله جعفري، عاشيق يوسف حسين زاده، عاشيق بيژن اسلامي وبالابانلار: آقاي پژاهنگ و جعفر علي پور

چيخيش ائدن شاعيرلر: درويش بهروان، رحمان مهرزاد(قاينار)، صمد مرادي، عسگر علياي(ياشيل)، خليل حشمتي، وحيد فروتن، احمدزاده تيليم خانلي. سلمان طاهري، علي خلج طايفه. اسدالله اميري ده چيخيشيندا ساوا و حكيم تيليم خان يوردوندان و هابئله مراسيمه قاتيلان مرغئي شورا و دهياري طرفيندن بويون زهرا اهلينه و درويش بهروانا تبريك دئيه رك ، جماعتي بو ايل حضرت علي(ع) نين ولادتي گونو مرغئي ده قورولاناجاق حكيم تيليم خان بئشينجي قورولتايينا دعوت ائله دي. اميري سونراحكيم تيليم خانين بير شعريني اوخودو.

سونرا خانم رحیمه محمدی اوستاد شهریاردان بیر خاطیره نقل ائتدی: من اوستاد شهریارین حیدربابا شعرینی توخوموشدوم(گلدوزی) و اونو اوستادا هدیه ائتمک اوچون گئتدیم اوستادین ائوینه. من تابلونو اوستادا هدیه ائدرک دئدیم: باغیشلایین من فارسی دانیشیرام چون تورکو بیلمیرم . اوستاد دئدی: عیبی یوخ بیز اوخویوروق سیزده توخویوسوز. قید ائتمک لازیمدیر  کی خانم محمدی تبریزه گلین گلمیش فارس بیر خانم دیر کی ایندی تورکجه نی ادبی صورتده کامیل بیلیر و دانیشیر.

مراسيمين ادامه سينده درويش بهروان و باشقا شاعيرلره اسلامي ارشاد اداره سي طرفيندن هديه وئريلدي و صلوات و پذيرايي ايله مراسيم ساعات 8 ده باشا چاتدي.

3 پاسخ to “بویون زهرا دا شاعیر درویش بهروان اوچون عزیزله مه توره نی / اسدالله امیری”

  1. آشیق گونش علی رمضانی Says:

    سالاملار اولسونچؤخ گوزل دیر بیزده اؤز نوبهمیزده اوستاد بهروان جینابلارینا ساغلیق آرزیلاییریکچؤخ گوزل اولاردی آشیق مسیح الله رضایی دااولساییدی

  2. ذوقی Says:

    اولو تانری دان سایین شاعیریمیز «درویش بهروان» جنابلارینا داها آرتیق اوغورلار و باشاریلار دیله‌ییره‌م. تانری ایناللی به‌ی‌لرینی یورماسین و اونو بیزیم ائللریمیزه چوخ گؤرمه‌سین.

  3. یونس Says:

    سلام تبریزدن ساق اولون یاشاسین

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s


%d وب‌نوشت‌نویس این را دوست دارند: