میللی حرکت، عشق و ائتیمولوژی / سید حیدر بیات

آذربایجان میللی حرکتین‌ده بعضی نسنه‌لر اپیدمی‌‌یه چئوریلیب. او نسنه‌لردن بیریسی ده ائتیمولوژی قونوسودور. بو قونودا بیزیم ایچیمیزده طنز خاطیره‌لر ده آز دئییل. منیم ده بو قونودا چوخلو گولمه‌لی خاطیره‌لریم واردیر. او جومله‌دن: بیر یول حسن به‌ی هادی ایله تورکمن چؤلون‌ده ، محمود عطاگؤزلوگیلده ناهار یئییردیک. دادلی آنجاق سوموکلو بالیغین سوموکلرینی آییرماق چتین بیر ایشه چئوریلمیشدی. بیرده‌ن بیره حسن به‌ی دئدی: آی بالام! بو بالیغین سوموکلرینی آییرماق ائتیمولوژی‌دن‌ ده چتین‌دیر.
بونلا یاناشی ایریلی خیردالی خاطیره‌لریم اؤزو بیر کیتاب‌دیر. آنجاق بو قونودا ان شیرین خاطیره‌م ایکی اوچ هفته بوندان اؤنجه‌یه عاییددیر. براتعلی فتح‌اللهی و فتح الله ذوقی ایله تیلیم‌خان کندینده گئدیردیک. یولدا علی‌کمالی‌دان سؤز گئتدی. امیری به‌یین تعریفله‌دی‌یی بیر خاطیره یادیما دوشدو. دئییر: علی کمالی کند به کند تیلیم‌خان دیوانی‌نین نوسخه‌لری‌نی آختاریرمیش. کندلرین بیریسینده بیر یاخشی نوسخه‌ گؤرر. آنجاق نوسخه‌ ییه‌سی بونو ساتمیرام دئیه‌ر. کمالی دئیه‌ر: آی قارداش! چوخ آز اتفاق دوشر بیر نفر منیم کیمی هم تیلیم وورغونو اولا، هم ده پولو اولا، بونو منه ساتماسان داها کیمسه‌یه ساتا بیلمزسن. نوسخه صاحاب قبول ائتمز. کمالی یئنی‌دن دئیر: آکیشی بو نادر بیر اتفاق‌دیر، بیر نفرین منیم کیمی هم تیلیمه ماراغی اولا، هم پولو اولا، هم ده دورا کند کند دولانا گلیب سنی تاپا.
کیشی یئنه قبول ائله‌مز. کمالی حیرصله‌نر: آی قارداش! بو هئچ زامان اتفاق دوشمز، بیر نفرین هم پولو اولا، هم تیلیم عاشیقی اولا، هم ده منیم کیمی ائششک اولا، دورا گله سنین قاپی‌یان.
**
هه سؤز اینسانلاردا اولان عشق‌دن گئدیردی. دئدی‌ییم ائپیدمی خسته‌لیک اوچون هر سؤزجویو ائشیدن‌ده اونون کؤکونو آرایارام. عشقه گلدیکده من اونو تورکجه بیر سؤزجوک بیلیب، دیواندا گئدن اوزئک له کؤکداش بیلیرم. آنجاق او گون مره‌غئی‌یه گئدن‌ده کمالی‌نین بو خاطیره‌سی ایله یاناشی بیرده‌ن بیره یولداشلارا دئدیم: تاپدیم! آقا! عشق، ائششک‌لیک کؤکوندن توتولوبدور. هامی گولدو، آنجاق سؤزومو اینکار ائدن کیمسه‌ ده تاپیلمادی.
مره‌غیه یئتیشدیک. سایین امیری‌نین آناسی‌نین ختمی‌ایدی. او آنلار اونودولماز و آجی آنلار ایدی‌لار منه. گؤردویوم، قوناق اولدوغوم و سئودی‌ییم بیر آنانین تورپاغی اوسته گئتمک هئچ ده راحات دئییلدی. کدر توزو اوزلره قونموشدو. نه ایسه بیر ایکی ساعات سونرا کنددن چیخاندا گؤز یاشلاری ایله یاناشی بو ائتیمولوژی‌نی امیری‌یه ده دئدیم. ماشینین شوشه‌سی‌ امیری‌نین گولوشونو قابا سالدی. بئله‌لیکله اورادان وداعلاشدیق.
بو اتیمولوژی‌نین نده‌نی بلکه بیزیم او تورپاغا حدسیز حیساب‌سیز بسله‌دی‌ییمیز سئوگی‌دن آسیلی‌دیر. بیز هئچ بیر مادی نفعی گؤز اؤنونه آلمادان اورانی دلی‌لر کیمی سئویریک.

یازیدان سونرا:

یازیدان سونرا ایلین ان اوزون گئجه‌سی‌نی دوستاقلاردا کئچیرن یولداشلارین یئرینه بیر دیلیم قارپیز یئمه‌نیزی تمنا ائدیرم.

قایناق: http://www.hbayat.azerblog.com

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s


%d وب‌نوشت‌نویس این را دوست دارند: