میللی قهرمان: علی کمالی/ دوکتور جواد هیئت

آچیقلاما: بو گونلر دوکتور علی کمالینین ۱۳ونجو ایل دونومودور. علی کمالی ۱۳۷۵ مرداد آیینین اون بیرینده تهراندا وفات ائتمیش، مزاری بهشت زهرانین ۳۲ ینجی قطعه سینده دیر. روحو شاد اولسون.

بسم الله الرحمن الرحيم

الله هامييا ساغليق وئرسين و سيزلري ده منيم کيمي قوْجالتسين.  عزيز دوستلاريميز بيزدن ايسته­ميشلرکي, آنا ديليميز حاقّيندا چوْخ آز دا اوْلسا دانيشيم و من ده عوٍذز ايسته­ميشديم.  چوٍنکو بو مجليس درس کيلاسيندان يوخاري بير مجليس دير.  خصوصاٌّ کي آللاهين ائوينده, ان موٍقدّس سايديغيميز مسجيدده تشکيل تاپيب.  آمما بيردن ياديما دوٍشدو کي, بيزيم بير وظيفه- ميلّي, شرعي, اينساني بورجوموز وار.  نئجه کي بورا ييٌغيشميشيق گئچميشده­کي بؤيوکلريميزدن دانيشاق و اوْنلارين روحو اوٍچون فاتحه اوخوياق و صلوات چئويرک. اونلارين هوٍنر و فضيلتلريندن دانيشاق. بيزه وظيفه­دير کي بئله بير آداملار اگر ديري ايسه­لر و آراميزداديلارسا, اونلارداندا آزاجيق دانيشاق. نئجه کي مندن اول بير خطيبيميز سؤيله­دي: من لم يشکر الخلق کيف يشکر الخالق. بيزده عادت بودور کي يا قدرتده اولان آدامدان تعريفلرلر يا دا اؤلندن سورا.  آمما اؤلندن سورا بؤيوک آداملاردان مجد ائتمک, تعريف ائتمک, مدح ائتمک بير ميلي وظيفه­دير. نئجه کي اوستاد شهريار, تيليم­خان, اوستاد قشم­دن بوردا دانيشماق, مدح ائتمک, تمجيد ائتمک ده بؤيوک ثوابدير. آمما ائله­جه ده آراميزدا اولان کمالي­دن دانيشماق و اونون کمالاتيندان دا بير پارچا بوردا سؤز ائتمک منجه بؤيوک بير اينساني وظيفه­دير. چوٍنکو بيزه بو بؤيوک تيليم خاني تانيدان بو کمالي­دير. يالنيز بيزه دئييل, بؤيوک وطنيميز ايرانا حتّي دوٍنيايا تيليم خانلاري تانيتديران کمالي­دير. اؤزو دئديگي کيمي قارا بولود آلتيندان چيخاران اودور. اوناگؤره من اؤزومه وظيفه بيلديم کي سکوت ائتمه­يم, سوسمايام, بلکه 13 ايلدن بري حيس ائتديگيم, دويدوغوم دويغولاردان سيزه بير آز دانيشام. کمالي منجه بيزيم بؤيوک ميلّي قهرمانيميزدير.  قهرمان او دئييل کي فقط بير دوٍشمني يئره وورسون و حريفينه غالب گلسين. خلقي­نين فضيلتلريني قارا بولود آلتيندان ايشيقليغا چيٌخاران آدام قهرماندير. من 13 ايلدن بري کمالي­ايله تانيشام. اگر اونو کمالي دئيه خطاب ائديرسم مني عفو ائتسينلر. من کمالي­دن يوخاري بير کمال گؤره­بيلميرم. اونون اوٍچون ائله اونا چيلخا, ياپا- يالين آدي­ايله خطاب ائديرم حقيقتاٌّ الاسماء تنزل من السماء.  حقيقتاٌّ مسمّالي بير ايسيم: کمالي. اؤزو ده کيچيک آدي علي. هميشه آللاهدان ايستيرم کي علي اونون اليني توتسون و قيامتده ده علي­ايله محشور اولسون. من اونا بوندان بؤيوک دعا ائده­بيلمَرم.

13 ايلدي بيز ديليميزين, ادبياتيميزين و فرهنگيميزين احياسي اوٍچون چاليشيريق. پهلوي رئژيمينده تابدالانميش, قدغن, ياساق ائديلميش, ديليميزي تازادان ديرچلتمک اوٍچون ايشليريک. اونون اوٍچون ياخيندان بيربيريميزي تانيريق.  بيزيم يازيچيلار, شاعيرلريميز کمالييي بير ميلّي قهرمان کيمي تانيرلار. من اونا غبطه ائديرم. او 13 ايلدن بري هر واقت وارليق چيخار اؤز جيبيندن وارليق دان 300 دانا آلار, ساوا و ساوا کندلرينده پايلار و ساوالي قارداشلارينا و قارداشلاريميزا ديللريني, گؤزل ادبياتلاريني اؤيرتمگه چاليشار. من اونون بو فداکارليغينا هم حئيرانام, هم غبطه ائدرم. آللاه اونون کيمي­لريني بيزيم ائليميز ايچينده زياد ائتسين, آرتيرسين. چوٍنکو کمالي کيمي صاحيب کمال بيزده يوخ کيمي­دير و بوگوٍن بيزيم بو حالدا قالماغيميزا سبب ده بو اولموشدور. بيزده ميليونر, ميلياردر چوخدور, بازار بيزيم اليميزده­دير پيياسا, بورس بيزيم اليميزده­دير؛ آمما فرهنگيميز يئتيم قالميش­دير. چوٍنکو بيز هئچ ديليميزه, فرهنگيميزه (فيکير وئرمگه) پول قازانمادان فوٍرصت, ماجال تاپانميريق.  کمالي اؤز عؤمرونو, جوانليغيني, ثروتيني, عائيله حياتيني بونون اوٍچون فدا ائتميش.  اوٍميد ائديرم آللاهين يارديمي­ايله, جمهوري اسلامي­نين يارديمي­ايله, تيليم خانين مقبره­سي اونا لاييق بورادا تيکيلسين و اونون اؤنونده بو ميلّي قهرمانيميزين دا هيکلي تيکيلسين. من هم علي کمالي يه آللاه دان توفيق, ساغليق, اوزون ايللر موفقيتله چاليشماسيني ديله­ييرم. هم ده آللاه­دان يالواراراق ايسته­ييرم کي کمالي کيمي­لري بيزيم ائليميزده چوخالتسين. چوخ ساغ اولون.

جومعه آخشامي۴/۷/۱۳۷۰ – حکیم تیلیم خان بیرینجی قورولتایی-ساوا-مرغئي- آشاغي قالا مسجيدي.

قایناق: یادنامه حکیم تیلیم خان کیتابی

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s


%d وب‌نوشت‌نویس این را دوست دارند: